14-15. oktober 2015  var det fjordfiskedagar på Stamnes. Skuleborna fekk segla med Brørvikskuto, dra fiskefangst, klinka båtbord og laga seg fiskereiskap ute ved Kvamsholmen. Veret var fantastisk med fargerike fjordlier over ein spegelblank fjord.  Tekst og foto: Sveinung Klyve   Dette er 10. året at Vaksdal kommune er med på opplegget, som Midthordland kompetanseregion står bak. Det er ein del av den kulturelle skulesekken i Hordaland. Instruktørar var Hordamuseet ved arkeologane Espen Kutschera og Ole Mikal Ramsøy. Lokale instruktørar var lærar Anita Vik og miljøvernrådgjevar Sveinung Klyve. Brørvikskuto var sentral i opplegget i 2015 slik som på eit liknade opplegg to gonger før. Skutefolket ved; Trygve Kallestad, Kjell Leiren, Lars Olav Elifsen, Andreas Stamnes, Ove Gunnar Dyvik stilte opp med Brørvikskuto og Ola Kvamme var slepebåt med Veafjord. Dei to dagane var skulane Stamnes, Eksingedalen og Dale med på opplegget med ca 45 elevar + lærarar.

 

For eige segl:

Borna fekk vera med på få trekkja garn frå Brørvikskuto. Fangsten var fin, for det meste makrell. Det hadde også havørna som bur i området oppdaga. Ho sveva over båten og håpte på å få seg ein godbit.

 

Så var Brørvikskuto ute i den opne Veafjorden og segla for eiga maskin. Det var ikkje så mykje vind, så ein måtte ta dei lange årene fatt i staden. På Kvamsholmen gjekk alle i land for å laga mat av fiskefangsten. Her er eit stort naust som det var godt å komma under. 

Fyrst vart fisken sløydd og filetert. Han vert steikt på bålet og alle fekk smaka, noko som slo ann og praten gjekk høglydt.

Så vart borna delt inn i stasjonar der dei lærte å klinka saman båtbord med jernnaglar, slik som Brørvikskuto er laga. Dei lærte også å tvinna fiskenor og å laga seg klebersteinsøkje. Det vart også vist fram ein regndress laga av kalveskinn, som ein unge fekk prøva på seg.  Dette var litt av ein artig skuledag høyrde eg nokon av borna prata om borti ein krok, medan dei koste seg med eit stykke av nysteikt fersk makrell.

Den rekonstruerte vedaskuta Brørvikskuto, er vorte ein flytande tradisjonsberar av fjordkulturen i Nordhordland. Då dampskipa kom inn i fjordferdsla på midten av 1800-talet fekk det dramatiske følgjer for skutetrafikken. Båtane var høgde opp og brukte som kledning til naust eller dei rotna bort.

Bilettekstar:

1.      Brørvikskuto på tokt med spegelblank  sjø, blå himmel  og fargesprakande fjordlier.

2.       10 meter lange årer krev sterkt mannskap med 5-6 barn på kvar åre eller to vaksne.

3.       Trekkjing av garn med fin makrell

4.       Fin makrellfangst

5.       Borna flettar seg fiskesnøre

6.       Regndress laga av kalveskinn, tresko og ullvottar var fiskaren sine klede på 1800-talet.